أنا والمدينة الجامعية للأزهر

نظراً لاني طالب ازهري جيزواي من الجيزة يعني :D فلا يحق لي أن أسكن في المدينة الجامعية للطلبة اللي هيه اصلا مش مدينة جامعية للطلبة علشان بيعتبروني إن أنا أنتمي لمحافظات القاهرة الكبري وممكن اروح الجامعة واجي في نص ساعة .. طب أنا مش قاعد في الجيزة وبحتاج مثلا أقل حاجة ساعتين ونص علشان أروح بيتنا.. وبناء عليه فبشوف سكن أنا وزمايلي يكون قريب من الجامعة.. المشكلة بقي لما تلاقي لمؤاخذة في اللفظ سمسار بيحشش يتحكم فيك ويستغل حاجة زي كده ويغلي إيجار الشقة براحته ونظراً لإن أنا مجبر علي كده فلازم هاخد شقة بأي تمن علاوة بقي علي مصاريفي أنا كطالب مش أقل من 10 آلاف سنويا ( ده أقل حاجة علي فكرة ) .. وأنا اللي بتولي أكلي الخاص .. بشوف إذا كنت هعمل أكل لنفسي مع اني مبعرفش أطبخ :D  ولا هشتري أكل من بره وخلاص وغالبا بشتري من بره .. علي ما أعتقد نفس النظام ده بيبقي مع بنات الأزهراللي بيبقو من القاهرة الكبري .. إزاي المسئولين بيسمحو لنفسهم إن بنت تكون بتسكن في شقة لمجرد إنها تنتمي لإحدي محافظات القاهرة الكبري ومش خايفين عليهم كده ؟ ... أنا عن نفسي مش بحب مدينة الطلبة دي وأعتقد إن أنا لو كنت تبع محافظة تانية مكنتش هسكن فيها بالحال اللي عليها ده دلوقتي .. اللي أنا بتمناه إن دخول المدينة يكون حق مكفول للجميع وإن المسئولين فيها يحاولو يطورو من المباني والغرف التي لا تليق بطلاب الأزهر أو بأي طالب علم .

5/9/2013