مطرة يا دنيا مطرة

تعرفي ياللي اسمك إيه النهاردة الدنيا مطرت عندنا لمدة أكتر من ساعة. طلعت في البلكونة عندنا تحت المطرة وكنت فرحان أووووي وفضلت أدعي ربنا بقي ليا ولكل الناس اللي بحبهم اللي إنتي منهم طبعاً :) .. وعلي رأي الإنقلابي عادل إمام إنتي كيس وأنا كيس :D ..دعوة ليكي ودعوة ليا.. وأقوله يارب اللهم إني أحببت عبداً من عبادك فاجعل لي فيه نصيب يارب .. أيوة أنا بحبك ياللي إسمك إيه وبتمناكي في الحلال وإنك تبقي مراتي نصيبي وأم عيالي .. ياااااه ده هيبقي أحلي نصيب في الدنيا ربنا كرمني بيه .. هوه حد يطول في الزمن المهبب اللي إحنا فيه ده دلوقتي  يتجوز اللي بيحبه .. ودعيتلك بقي وقولت ربنا يحفظك ويحرسك ويخليكي ليا ويوفقك في دراستك وتبقي من الناس الأوائل كده يا عثل .. آه من الأوائل طبعاً علشان يا إسمك إيه لو مبقتيش من الأوائل مش هتجوزك .. وكمان تكوني بتحبي القراية زي عنيكي ..  آه اللي أوله شرط أخره نور .. تعرفي كانت نص دعواتي لربنا ليكي إنتي بس يا قمر وكنت بسأل نفسي ليه أنا بدعيلك كتير كده .. أتاري اللي بيحب حد بيدعيله .. أنا بحب الشتاء أوي علشان المطرة .. أول بس ماسمع صوت دبة المطرة علي الأرض أجري أتوضي علشان أصلي وادعي ربنا ليا وليكي وأقوله يارب أنا بحب البت المجنونة دي اللي مش عارف بحبها ليه .. هوه من إمتي اللي بيحب حد بيعرف بيحبه ليه ؟ ..الحب ده ربنا بيزرعه في قلوبنا وإحنا ملناش دخل فيه .. بس مع الوقت يا إسمك إيه عرفت أنا بحبك ليه .. علشان لقيت فيكي جمال الدنيا اللي بحلم بيها .. علشان لقيت فيكي أم لأولادي بحنيتك وطيبتك .. علشان لقيت فيكي أبويا وأمي وأخويا وأختي وصديقي .. لقيت فيكي عيلتي.. علشان لقيت فيكي قول الله تعالي الطيبون للطيبات . علشان لقيت فيكي القلب الحنين اللي هيبقي جنبي دايماً وعمره ما هيتخلي عني مهما حصل .. علشان لقيت فيكي الإخلاص والوفاء . لما نتجوز يا إسمك إيه إن شاء الله ويبقي فيه مطرة هنتوضي وأصلي بيكي إمام .. أيوة ما أنا هبقي سي السيد بقي ;) . وأقوله يارب شكراً إنك رزقتني باللي بحبه وأشكره علي إستجابته لدعايا وأقوله البت اللي بحبها يارب قاعدة جنبي أهيه  وإنتي هتبقي ميتة علي نفسك من الضحك طبعاً :D .. هندفي بعض بحكايتَنا وإنتي هتفضلي ترغي ترغي ترغي لحد ما أزعق فيكي بقي وأقولك بس يا رغاية صدعتيلي دماغي :D .. هنخلي حياتنا كاملة بينا إحنا بس وبعيالنا إن شاء الله اللي هنربيهم أحسن تربية... لما نتجوز ويبقي فيه مطرة هننزل في الشارع تحت المطرة ونفضل نلعب مع بعض .. آه عادي .. الناس هيقولوا علينا مجانين يعني .. طب ما إيه يعني ما يقولوا ..أنا وإنتي أصلاً مجانين بحب بعض .. علي فكرة يا إسمك إيه إحنا مش هيبقي لينا دعوة بحد ولا هيهمنا كلام الناس .. طالما مش بنعمل حاجة تغضب ربنا يبقي هنعمل كل اللي نفسنا فيه .. هنعمل كل حاجة تخلينا  مبسوطين وفرحانين ومزقططين :D  ... أنا عارف إن إنتي كمان بتدعيلي دايماً لما السما بتمطر.. إنتي بتدعي في مكان وأنا بدعي في مكان تاني بس قلوبنا مع بعض .. بس أنا مستني يا حبيبتي اليوم اللي هندعي ربنا فيه مع بعض .. تعالي بقي يا اسمك إيه علشان نغني مع بعض مطرة يا دنيا مطرة .. مطرة وإتلاقوا الحبايب .. مطرة يا دنيا مطرة ولا عدش حد فينا غايب :) .. بحبك يا اسمك إيه :)