شاب خد خطوة

من صغري وأنا بحلم إني أكون عامل مؤثر في المجتمع بتاعي ..  نفسي أشوف بلدي مصر أحسن بلد في الدنيا.. بعترف إني  كنت قبل الثورة المصرية شاب مفيش غير في حياته غير أكل وشرب ونوم ومكنتش بحب القراءة أوي وكنت مهتم بدراستي برضو ومكانش ليا في حاجات كتير لكن بعد الثورة فعلا أنا فوقت . الواحد كان حاسس إنه كان في غيبوبة وفاق منها ومقدرش أكدب عليكو أنا جاتلي أيام ندمت علي الوقت اللي كنت بضعيه هباءاً في حاجات مالهاش لازمة مع إني لسه سني صغير بس الثورة المصرية كانت بالنسبالي قلم علي الخد بيقولي فوق من اللي إنت فيه بدأت أعي لكل اللي بيحصل حواليا وبدأت أغير من نفسي في كل حاجة ومش بقول إن أنا بقيت إنسان كامل بدون عيوب أو أخطاء لكن الواحد بيحاول يغير الحاجات اللي مش كويسة فيه علي قد ما يقدر ....أنا مقتنع تماماً إن ثورة تعني ثورة علي النفس هل ثُرت علي نفسك قبل كده ؟ بدأت أتابع أخبار وبدأت أجيت كتب وأقرأ وأقرأ وأقرأ وأحاول دايما إني أطور من نفسي ..كمان بدأت إن أنهي أي حد بشوفه بيعمل حاجة غلط في مجمتعي في الشارع في البيت في الكلية في أي مكان  مع إني في بعض الأحيان كنت بتلقي شتائم من بعضهم يعني علي سبيل المثال لو شفت حد بيرمي ورقة في الشارع بعرفهه وأفهمه إن ده غلط وإنه مينفعش يعمل كده ( ولتكن منكم أمة يدعون إلي الخير ويأمرون بالمعروف وينهون عن المنكر وأولئك هم المفلحون ) بقي اللي يقولي وإنت مالك واللي يقولي ياعم هوه إنت اللي هتغير النظام أي نعم بيجيلي إحباط لما ألاقي ناس بتقولي كده بس لسه عندي أمل إن الناس تتغير وإن إحنا نبقي شعب راقي في كل حاجة راقي في تعاملاته وكلامه وأفعاله وهكذا .. عايزين نتعلم إزاي نحترم بعض نقدًر بعض نسمع لبعض نتعلم نتحاور وإزاي نحترم الكبير وإزاي نطبطبب علي اللي أصغر منا .. ما تيجو نعترف بأخطائنا مش عيب والله إننا نعترف بيها ما تيجو نحس إن إحنا عاديين وإن إحنا كمصريين محتاجين سنين علشان نتغير ما تيجو نحب بعض بجد ؟؟ ليه مبقناش بنحب بعض ليه بقي الليبرالي والعلماني بيكره الإخواني والعكس ليه بيشتمو في بعض لأ وإيه كمان ممكن يقتلو بعض لمجرد إختلافهم في الآراء ليه بقينا بنكفًر في بعض ؟ ليه الإستقطاب الديني الموجود ده ؟؟ هوه إحنا نسينا إننا مسلمين . الليبرالي مسلم والعلماني مسلم والإخواني مسلم ... ياااه لو كلنا إتحدنا وبصينا لمصحلة مصر مش كل واحد بيبص لمصلحته الشخصية :( .. بجد قلبي يئن بسبب ما يحدث في مصر في هذه الأيام ...  أنا شاب خد خطوة وإنت كمان هتبقي شاب خد خطوة .كل واحد يبدأ بالتغيير بنفسه أولا ويحاول أن يعمل علي توعية الآخرين في شتي المجالات إن يسع وقت له لذلك :) . عايزين نبقي مجتمع شرس لغوياً وعلميا وأدبيا وثقافيا وكل حاجة . عايزين كل واحد فينا يبقي عنده شياكة عقلية :) .. مفيش حد فينا كبير علي العلم ومهما قرأ وبحث سيكون أيضا علمه قليل . ربنا بيقول في كتابه ( وما أوتيتم من العلم إلا قليلا ) .... ها هتبقي شاب خد خطوة ولا هتفضل في مكانك ثابت ؟

قمت بكتابة هذه المقالة في عام 2012
29/11/2012